« Ha Ğazi, az çı eli qıləvıjınə
sipirişonədə qıləyim. Bı məholədə həməkəs bəmı hurmət kardedə. Bə qıləy məclis
dəşeyədə həməkəs səpo əştedə. Əmmo, zinə
ruji qıləy məclisədə ım odəmi mınış xar kardışe. Çımı abruj bə zəmin jəşe. Mınış təhğir
kardışe. Xahiş kardedəm, çəy həxədə ğəror bıdənən. »
« Sıftə bəpe bə həməkəsi votəyon quş bıdəm. »
De həmonə odəmi omə ço qılə şoydiyən bino
kardışe qəp jəy:
« Ha Ğazi, az şoydim ki, ım əğə bo cəmoti çənə ko
vindedə. Əmə bı çandə soron ovi de
dasti çı diyəroə vırono kırnedəbimon. Im
mığəddəsə odəmi bə diy ov okırnışe, çəmə conış ənə əziyətiku peroxneşe. »
« Azən şoydim ki, ponə sorədə çı dıqılə yətimi kə
rıjiyedəbe. Diy cəmot qırdə be ki, ə kəy bıduton. Əmma, çəmə ım əğə bə hiç kəsi əmon nıdoşe, ıştən
coylinə dutışe ə kə. Hələən çı diy cəmot boəy dıvo-səno kardedə. » – dıminə şoydı votışe.
« Azən şoydim ki, dı sor çimi bənav noxəşi eqıne məzədə
bə taxıli dılə. Diy cəmot vəşiku nımardo, əğə çı hamsuə diyono deştə puli
qandım hıriyəşe, bə diyvıjon paybaxş
kardışe. Im xəbə şe rəsəy bə kişvəri yoli. Bəvədə şahi bo əğə qıləy bohoynə xələt vığandəşbe. Çəy kardə xəyə
koon həxədə. » – seminə
şoyd daməbe.
« Azən şoydim ki, çəmə əğə çan qılə cıvononış deştə vəsoiti
kəxıvand kardəşe. Xıdo çəmə əğəku ve-ve
rozi bıbu. Əmə bovə kardəmon ki, əv vəyştədə çı məlaikon dılədə bəbe. » – oxominə şoydiyən ıştə sıxanonış jıqonə
votışe.
Bə har ço qılə şoydi həmə quş doy bə peşt,
Ğazi ıştə dimış qəte bə şikoyət kardə merdi, çəyku xəbə səşe:
« Məclisədə tı bə ım odəmi boçi behurmətəti kardə?
Iştı doə cəvob mıni qane nıkə, bətı qonə cəzo bədom. Diyovıjon həmə qırdə bəkam, çəvon vədə uzur bəpiyeş. »
Həmonə odəm dəmande qəp jəy:
« Ha Ğazi, az qıləy kosibə xıyzonxıvandim. Iştən de
izım həvate, çimi-çəy soədə nokəti karde-karde ıştə əğlonım handovniyə. Əvon çı
ən çokə muəllimon tono şoqird bıən. Esə
çı hurmətinə xiyzonondə qıləy çımı xıyzoni çok zınedə. Çimı zoə çəy çokə
şaqird be qoroş, əvon bə çəmə kə şe-omə kardedən. Və bə ğəror omən ki, çımı kinə
boştə zoə bıstənın. Azən bı xəbə ve şo bim. Çan ruj çimi bə nav şem çı əğə
tono. Əçəy bo diyovıjon kardə koon zınedəbim.
Bəy votıme ki, bəmı bo cehiz səyro tikəy pul bıdə. Bini çoknəy bə co kosibə xiyzonon koməq kardedəş, bəmınən
koməq bıkə. Əmmo, puli jıqo bıdə, hiç kəs nızno. Bıdə ə hurmətinə xıyzonən
nızno.
Vote hiç
kəs nıbəznebu həni boçi kardəm ım çoki?!
Az səfe bıəm ıştə ənə puli ıyo-vəyo peşandım?! Maştə məclis heste. Cəmot həmə vəyo bəbe. Boy çı cəmoti vədə mıku
pul bıpiy. Az vəyo bətı pul bədom. Çoknə bə co kəson doydəm. – bəmı jıqo
votışe. Azən bı səbəb bə məclis oməym ki, çı pıxə odəmi dimi cəmoti vədə okəm,
har kəs əy çok bıznı. Bıdə həməkəs bızno əv çoknə odəme. »
Ğazi bı merdi votəyon quş doy peştə, dimış qəte bə “hurmətinə” əğə votışe:
« Iştı tosə imrujnə ruji kardəyon həmə dınyo moli ğəzənc
kardeybe. Xıdo roədə bı merdiyən koməq əkəyş
bo ə dınyoən zımhor əbiy. Əmmo tı jıqo qıləy səvobiku məhrum biş. »
AYTƏN
Eyvazon
Ambur N3 (03) 20 sentyabr 2018
Комментариев нет:
Отправить комментарий