Ğəzəl

Botıro az noxəşim, bəs boçi lığmon bomı niş?
Botıro mardə conim, bəs boçi ruf, con bomı niş?

Az ki, har şəv kəşedəm eşği şikil tam-tamijə,
Botıro astovəim, bəs boçi osmon bomı niş?

Qətedəm vey pəşi, çoknə bo şıği vıl qətedə,
Botıro hışkə bumim, bəs boçi ləyson bomı niş?

Votdəbiş har sıxanı şin-şini, qin biş həni şiş,
Botıro kanduləim, bəs boçi çəy şon bomı niş?

Bedə ov, vitdə zəmon, keynə detı qəp bıjənom,
Botıro qardə sorim, bəs boçi manqon bomı niş?

Iştı susard sıxanonku biyə bastə çımı dıl,
Botıro dəbyəşe dıl, bəs boçi tovson bomı niş?

Sıxanon boxçədə hey doydəbimon vusqə detı,
Botıro ruşnə ləlim, bəs boçi mərcon bomı niş?

Deştə eşği donə Aytən ojəşe havzə boğon,
Botıro eşği boğim, bəs boçi boğvon bomı niş?