Siconi hardim

Aytən Eyvazon

Ve ve vaxton bə nav ğədimə Deyləmədə Fatma nomədə zəhmətkəş və dindor jen jidəbe. Im jen həm zəhmətkəş, həm mubariz merd xosiyyyətinbe. Diədə har kəs əy zındabe, hurmət kardəbin. Di jenon çı dard bedəbe çəy tono omedəbin. Hamsuədə beə kali jenon bəy pəxiləti bəkan, dəy rəğabət dəşdəbin. Fatma şuə vijorədə de ticorəti məşğul bedəbe. Çok, bevəc ıştə rujon dəvardəbin, reçidəbin. İ mıddət bə nav Fatma jeni hamsuətiədə qıləy yolə, nom har tərəfədə məhşur bıə dindor alim omedə. Bımiku xəbə qətə di odəmon, co diədə jiəkəson həmmə ım alimi ziyarət omedəbin. İ ruj Fatma şuə bəy votedə: "xanım az ımruj alim hamsuə vijorədə vindıme, əy çəmə kə dəvət kardıme. Sıxan doy nezə rujonədə çəmə kədə ğonəğ bəbe. Tınan hozoəti bıka".
- Bə çəş. 
Jen ıştə merdi ın xəbə bə peşt hozoəti bino kardə. Kədə təmizəti koon kardə, kə divon andedə, ım hurmətinə ğonəği oməy hozoəti kardə. Bımiku xəbə qətə hamsuə jen rərə vitdə ıştə kə. Iştə şuə tono omedə və de təkidi votedə, "çiç bedə bıbu tı bəpe əv alimi çəmə hamsuəku bə nav ğonəğ bıkaş". Jen ənədə qəp jəydə, merd beəlac mandə şedə alimi kə. Dıroz dırozi israri bə peşt alim bəvon kə ğonəğ şe rozi bedə. Merd omedə ıştə jeni votedə : ha jen hozoəti bıkə şanqo ğonəğmon bəbe. Jeni ım xəbə ve şo kardə. Rərə şanqonə hozoəti kardedə. Soədə bıə ən yolə kaqi kıştedə. Plov patedə. Əlğərəz, şanqonə bedə ğonəğ omedə. İ mıddət çəvon kədə nıştə beşedə şedə. Həminə jen maştənə Fatma xanımı tono omedə. Im vaxt Fatma xanım şanqonə omeə ğonaği ro pate kijon vıjnedəbe. Əv kaqon dılədə se qılə cıvonə fərə vıjne. Hamsuə jen ımi vindeədə de rışxəndi votşe:
- Ay Fatma tı ım yolə ğonəğiro ım kijon bəkışteş? 
- Ha.
- Zinə ım yolə alim çəmə kədə ğonəğ be. Bəyro çımı soədə beə ən yolə kaqi kıştəbim. Həm se qılə kijə kışte məsləhət zınedənim. Ənədə hozoəti kardıme, kaqı sı kardıme nome çəy vədə, əmmo əv dı se qılə bırz harde ıştə nuni orxone. Şımə kədəən hiçi nıbəharde. Se qılə kijə zay məkə, hejo i qılə vəs bəka. 
- Ay hamsuə məqər tı məsə ni ki, Hz Əli votəşbe: kaq pərəndon xuqi təkiye. Ən çoka qujd tojə pərə kijə qujde?
Hamsuə jeni ranq sipi bedə. Zındəni çiç cəvob bıdə. İjən ıştəni arışdəni votedə: 
- Bəvindeş qonəğ hiç kijə qujdən ni bəha. 
- İmruj çımı ğonəğ siconi bəha rozi bəşe. 
Şanqo bedə. Yola dini alim Fatma kə ğonəğ omedə. Jeni şuə yolə ğonağı de hurməti səlom doe, bə kə dəvət karde, nıştışone. İtkə bə peşt jen sufrə oğandə, əvoni bə sufrə dəvət kardedə. Jeni şuə de alimin omedən nışdən sufrə kəno. Jen kədə beə har nemətədə noaşbe bə sofra. Xırmo, tojə patə təni nun, plov və maştə bırneə kijonədə qıləy sı kardəjbe noaşbe sofrədə. Qıləyən sufrə ə qılə otağədə boştə əğlonro oğandajbe. Boştə əğlonro ənədə xorək ekardəjbe ki, bıdə əğlon siconi bəhən ğonəğ bıə sofrədə çaşon nımandin. Iştənən sofrə joğo oğandəjbe ki, bıdə alimən bıvindo ki, əğlon siconi xorək hardən. 
Həmə nışdən xorək harde bino kardedən. Jen pardə peştədə diə kardedə. Vindəki alim xorəki das jəydəni. Bə fik şedə. Yodo varde pidə ki, çiç yodo bekardə. İberdəmədə nəzər alimi qınedə. Alim kəy eyvani pencəku, hamsuədə bıə ıştə kə tərəf diəkardəbe. Jen ıştə anqıştə ğıç kardə. Rərə şedə i ğəzən xorək ekardə, şedə bə alimi kə, xorəki əçəy xıyzoni doyda oqardedə. Omedə nışdə ıştə əğlon tono. ijən diəkardə ki, alim de yolə iştahi xorəkon hardedə. Jen bımiro ve şo bedə. Şanqonə harde bəpeşt alim çəvon kədə tikəy nışdə, sohbət kardə, peşo xəy dıvo kardə şe pidə ıştə kə. Kəybədə dəvon xudafizi kardeədə zevılə sırə kardə votdə: - "Imruj az siconi xorək hardim" Peşo dəvon xudafiz kardə şedə. Ğonəği rozi şe Fatma xanımi ve şo kardə.