Ovşum osmonədə coyli-coyli qardedə. Dırozə məsafəon qət kardedə. Ve ğıboyne. Coyli ğo kardedə. Zınedəni çiç bıka. Dust bero bənə bəştə kisə oşındabe. Əmmo səyon befoydə bedəbin. Jı bızın ın piyə osmonədə ğərəyz bəy hiç ki ni.
Coyliəti osəme əy ve pərişon kardedə. Ətrof beoxo toki. Əv isə coyli. Boçi ofəyə bə, boçi osmonədə qardə, bə sə dəşedənıbe. Iştə ofəyə səbəbi zınedənıbe. De ğo bə ətrof diyə karde-karde qardedəbe.
İberdəmədə tokiə osmonədə iyo-əyo vıriski doə astovon vindışe. Ve şo be. Astovon bə ha səmt peşandə bəbin. Jıqo bızın de iyəndı keş qətedəbin. Ovşumu ğəm-ğussə gin be. Vindışe ki həni coyli ni, ve şo be. İ muddət bə çəvon reçinəti təmşo kardışe. Astovon duz kardə cur-bə-curə şikilon Ovşumi fiki vıloşon kay. Ve hərabaxtbe. Bə ğərol oməy ki, çəvon tono bışu, deəvon dust bıbu. Bə ro eqıni. Jıqo zınedəbe çəvon tono şedə. Qarde-qarde de soron ro şe. Əmmo de həsrəti diyəkardəbə astovon rəse nıznəşe. Astovon çəyku ve diyəro aski-viski doydəbin. Isət əv ijənən coylibe. İjənən ğıboyn, beumu. Hakənə bə astovon diyə kardeyədə ah əkəşi, çaşonış pur əbi.
In oxonıbə osmonədə coyli mande fiki kardə vaxt, iberdəmədə əçəy navədə bə avon diyəro bedən və bəştə oxşə çiçsə vində. Ovşum bımi ve təccub kardə. In vındə çı Bum be. Iştənən bəy ve nez. Bənə astovon diyəro nıbe. Ovşum şo beku həninən ve ruşin be. Əçəy ruşnə Bumi tikəyən ruşin kardedə. Nuə dust bəy ve oxşə doydəbe, həmən çəyku fərqin be. İ muddət bə Bumi sə qardedə, bəy təmoşə kardedə. Əyo bə bandon, dəon, okeanon, ruon əy ve heyran kardəbe. Ən ve bə havzə vişon iyən rənginə dənıştqohon təmşo kardedəbe. Bum bəysə fərqin ve rangin be. In bə Ovşumi ve xoş omedəbe.
İ muddət Bumi seyr kardə bəpeşt bəvədə lıvə cismon vində. Çımon çiç be bəy ve maragin be. Ve ğəribə məxluqon bin. Har qılə de i qılə ko məşğul bedəbin. Kali qılon doon birnedən çiçsə dutdən, kali qılon ovədə sınov kardən, kali qılon isə bə bandon peşedən. Əmmo bo Ovşumi ən marağin əvbe ki, boçi ın məxluqon bə ivırə qırda bedən, peşo iyəndı kışdedən? Əvon ki bənə Ovşumi coyli nin. Boçi iyəndi kışde, coyli mande pidəşone? Əvoni bəsə dəşe bo Ovşumi ve çətinbe. Bə ğərol oməy ki, avon peştono bımondo, əvoni çaş bıka. Əmmo ve qəribəye. Əv avon peştonədə beədə sanki ın məxluqon kam hərəkət kardəbin. Im bo Ovşumiro ve marağin be. Əv avon peştono beşe. Həniən ve ruşin be, bə Bumi qurə ruşnə doşe. Odəmon əçəy ruşnədə ro şen, şanqo ıştə kon kardışone. Im Ovşumi ve şo kardedəbe. Bə kisə lozım be zıne əy ve hərabəxt kardedəbe. Hətto əçəy ruşnəku Bumədə ovonən ros bedəbin. Jıqonə dırozə soron Ovşum, Bum iyən vəy jiə odəmon dust bin. Bəvon tokiədə ruşnə davatedəbe, ro nuşo doydəbe. Kali bəjən ğo beədə avon peştono niyo əbi, deəvon hənək əkəy. Coyli nıbe qoroş ve hərabəxt be. Soron, qərinon jıqo dəvardedəbin.
Əmmo jıqo bızın Ovşumi bə Bumi piyemon itonəbe. Imi Ovşumən osəməbe. Bumi ruşin kardedə, bə odəmon ro nuşo doydə, əncəx ıştən hejo zılmotədəye. Ətrofış hejo toki be. Əncəx sərəsedənıbe ki ənnədə zılmoti dılədə əv çoknəy ruşin be zındə. Çımi səbəbış çiçe? In parsi cəvob pəydo kardero ijən bə səyohət beşe. Ve vaxt qarde. Boçi zılmotə aləmədə jiqo ruşin bedə əy zıneş pidəşbe. İyən bəçəy nav mohtəşəm xışmin oj be. Ovşum ın reçinətiku mot mande. In tam co, ve ruşinə çı be. In vində çı Həşi be. Əv bə Ovşumi diyəş kay, sırəy. Əçəy ruşnə Ovşumi bə heyrət vardışe. Həşi ruşinə, qamə şuon Ovşumi biyə bə dıli tat kardışe. In vaxt ovşum bəşdə diyə kardışe. Bəsə dəşe ki, Həşi ruşinəye əy ruşin kardəkəs. Nəhoyət əv ıştə parsi cəvobi pəydo kardışe. Çə rujo Ovşum iyən Həşi ve nezə dust bin. In dustiəti Ovşumi həniən ruşin kardışe. Bımi Bum iyən əçəy odəmonən şo bin.
Комментариев нет:
Отправить комментарий