BƏBE

Ruji obəqarde fələki çərxən,   

Bəşe zımson ijən əvəsor bəbe.
Həsrəti sardiku dəbiə dılon,
Çı eşği ğıvvəto qam, boxor bəbe.

Şo bəbe insonon jobızın dınyo,
Əncəx ranqrisinbə hiç bəni siyo,
Har kəs baxtəvəre ruşin bə Tokyo,
Məvot ım xəyole, əv oxor bəbe.

Fələk jıqo qardə rujon omedə,

Rəsəyon mandə kolon emedə,
Həni cohilonən bə pi damedə,
Bı cıvon sinədə ixtiyor bəbe.

Çanə şo bedəmon beədə mehmon,
Kədə hay-huy bedə hərkətdə xeyzon,
Fərqışni betondə tovson ya zımson,
Soədə hey qılə siməvor bəbe.

 Aşiq dıli çəşi bəvinde yori,
Bıpiyo de nozi, çəşi xumori,
Bəste yor dasiku çəy ixtiyori,
Yo dıl aşiğiro co şikor bəbe.

Ovşum çı həşiku səydə ruşini,
Yol ro nışo nıdəy əqəm şin-şini,
Bə miyon nəvoy hiç şeir çin-çini,
Aytən hejo bəşmə minnətdor bəbe.