Dınyo Pencə

Çı dınyo pencəku dəkardəm esə,

Purğıbo bedəm lap, dıldə ğəm-ğussə,

Çiçon vindedəm az, çiç omdə bə sə,

Ha Xıdo bə dınyo çiç məlhəm bəbe?

Çənə bı dınyodə hey sitəm bəbe?

Vindəm siyo bedə həmmə co ranqon,

Beməno dəvardə soron həm manqon.

Şey-şey ziyod bedə dınyodə canqon,

Tosə kenə jıqo dıldə ğəm bəbe?

Kenə dınyoədə qınon kəm bəbe?

 Har ruj çoko mardə vindəm vəşion,

Tılə ovi mandə həsrət təşion,

Həni rə eşedə pemə həşion,

Ə rujon bəbe ki, həmmə cəm bəbe?

Bı dardon har qıləy çokə çəm bəbe?

Vindəm hiç mandəni sıxanon zuən,

Bənə vənciniye qəvədə cudən,

Həxx sıxani vırə qətəşe duən,

Kenə tij şımşi ne, tij ğələm bəbe?

Şairon dılon ne, sütə şəm bəbe.

Vinde zındənim az sofə piyemon,

Hənəki peqardə, eşğ bo cohilon,

Mardedə etibo, sığ bedə dılon,

Kenə həyvon ve ne, ve odəm bəbe?

Ə rujon bəvindem? Əv məqəm bəbe?

Dıl sutdə vindedəm munafiq, dıdim,

Pidəşe okışto dino ço zolim,

Xıdo Ğıron bıbu kofiron ğənim,

Əvon zındənin ki, cəhənnəm bəbe?

Heson doə rujon, çəşon nəm bəbe?

Vindəm dustətiku mandəni məno,

Çəş kardən yəndıku həmmə təmənno,

Jəqo dustonku az kardəm imtino,

Kenə bevəc ruji duston dəm bəbe?

Bə yəndı mehribon, həm həmdəm bəbe?

Dəkardəm diyəro vindəm vəşə ço,

Im vəşə umuye, ruşine çəy ro,

İ dəm dəqiş karde bə dıl oməy şo,

Hərəbəxtə rujon qıləy qəm bəbe.

I ruj noxəş dınyo co aləm bəbe.