OMDƏ BƏ YOD

Ruşinə:

Dıtı co mandə şəvon har çəmə dəm omdə bə yod,

Iştınən har çəmə şəv çok zınedəm omdə bə yod.

Həşim:

Zınedəş çok çımı hol sutdə dılım çoknə bıkam,

Piyedəm az tıni vey bəştı qirəm omdə bə yod.

 Ruşinə:

Bənə ovşom omutəm zılmətə şəv coyli jiye,

Hərəbəxtim, həni kam-kam ə sitəm omdə bə yod.

Həşim:

Əkənim ıştı sıxan hiç bovə ğəssəm bəhəşən,

Bomı pərvonə tı biş az sutə şəm omdə bə yod.

Ruşinə:

Oməbim ıştı şəmi ruşnədə bo tospone dıl,

Iştı sardon nəzəronku dəbiyəm omdə bə yod.

Həşim:

Bəştı çəş həm sırədim təşnə bedəm rık məkə boy,

Detı har kardə sıxan şinbe əqəm omdə bə yod.

Ruşinə:

Zınedəş az ki, bıkam rık həni pardon bəsutem,

Hejo bəm ıştə sıxanondə həkəm omdə bə yod.

Həşim:

Im təkəbbur bəbe ha boy məkə anəndə ğurur,

Kardəbiş har çımı sehbət tı bəqəm omdə bə yod.

Ruşinə:

Bı məhəbbət mıni kardəşbe təmom ku, jıqo ki,

Əməni sutşe bənəy Əsli, Kərəm omdə bə yod.

Həşim:

İjənən rozi bəbem az bısutom əmmo detı,

Eşği aləm noə lap sıftə ğədəm omdə bə yod.

Ruşinə:

Iştəni vıl ənədəş kardə bəqəm vindəni teğ,

Qınokom az, bətınən vey doə ğəm omdə bə yod.

Həşim:

Eşğiku bəm jıqo məst az, hiçi co vindedənim,

Çımı dıl doğ bıkə teğ təkror oməm omdə bə yod.

Ruşinə:

Kardedəş tov çımı noz, az bətı doydəm ve əzob,

Peşoən bəm pəşimon çəş bedə nəm omdə bə yod.

Həşim:

Şine har ıştı əzob hiç məbi pişmon bıkə noz,

Bıbu tel eşği şərob həm şine təm omdə bə yod.

Ruşinə:

Həni boy hiç nıbəmon yəndıku co tov əvanim,

Çı əzobon ki, kəşəm həmmə hələm omdə bə yod.

Həşim:

Eşqi aləmdə vətəndoş zınəmon be əbədi,

Kardəmon ros vəyo sof eşği ələm omdə bə yod.

Aytən:

Çənə şair bıjiyo har yolə eşğən bəjiye,

Səydə Aytən jıqo eşğon bə ğələm omdə bə yod.

  Aytən Eyvazon