Gözəlim

Niyə sən incimisən yenə məndən gözəlim,
Keçə bilməz bu ürək qəti səndən gözəlim.

Hələ xoşdur əzabın onu bir-bir yığıram,
Tökürəm hər birini telə dən-dən gözəlim.

Etibarın axı heçdə gülüm qırmamışam,
Yetər əl çək bu qədər suyi-zəndən gözəlim.

Dedi mənsiz keçəcək bu həyat qorxudaraq,
Sənin işvən çıxarır ruhu təndən gözəlim.

Açıq-aşkar boğular belə sevgi yaşasaq,
Çıxaraq eşqimizi qatı çəndən gözəlim.

Susub Aytən nə desin o gözəl nazlı gülə,
Onu gəl etmə qərib bu vətəndən gözəlim.