CAMAL LƏLƏZOƏ – 65

NƏCİMƏ ODƏM –  Camal Lələzoə ənvışt, şair iyən muəllim bey ziyodə həmən çokə insone. Əv bə har kəsi səmimiyə mınosibət nışo doydə. Ve kam odəm pəydo bəbe ki, əçəyku norozi bıbu. Har vaxt deştə humanistəti bo cıvonon nımunə bıə. Çəy dılətoni dınyo, bənə ovəynə şeironədəşən əks bedə. Pozitiv və hejo pur enerjinə odəme.

Xəlği yolə zoə, şərəfin inson,

Boştə xəlği roysə noydə ıştə con,

De yoli yole əv, de ruki cıvon,

Çanədə mehribon, çanədə həlim,

Tarix nıvıştedə Camal müəllim.

AZİZƏ MUƏLLİM – Az de umi vote bəznem ki, Camal muəllim boştə vıjniyə ım şərəfinə peşə edəku çok omedə, çəy həxi de ləyoğəti doydə. Çəy şogird nıbumən zəmon-zəmon çəyku məsləhəton səme. Camal müəllim çımı  şeir və ya ğəzəlonədə vadoə səfon de jıqo həlimə zıvonədə izoh kardəbe ki, hiç çımı rufən norəhət bedənıbe. Hiç vaxtiyən insonon səhvi bəçəy dim oşko əvotni. Ve baxtəvəre ə şogird ki, çəy jıqo mənəviyyətinə muəllimış heste.

Qıləy barzə bande çəy vıjniyə ro,

Şagirdon ləpəyin əv ısə dıyo,

Muəllime ruşnə çı tokyə dınyo,

Voşnedə çanə ço çəy doə təlim,

Tarix nıvıştedə Camal muəllim.

QİRAMİNƏ NASİR  - Tolışə xəlği ve piyə ənvıştonədəye Camal muəllim. Nəsr janri kam inkişaf kardə devrədə Camal Lələzoə deştə əsəron çəmə ədəbiyyati zənqin kardedəbe. Əçəy bəştə məxsusi uslubış heste. Əv ıştə əsəronədə tolışi diyovıjə jimoni təsvir kardedə. Əv ıştə məsə hekayon nəsr formədə bəştə xəlği rosnedə. Isətnə devri folklori qırdə karde iyən bə vəomə nəslon rosneyro Camal muəllimi yolə zəhmətış heste. Çəy nıvıştə hekayon, novellon, oçerkon, lətifon bə əhandon ve  xoş omedə.

Deştə nıvıştəyon folklor kardə cəm,

Əv aləm nasire hestışe co çəm,

Hejo zıne bedə tije çəy ğələm,
Çı ğələmi navdə şımşi bə təslim,

Tarix nıvıştedə Camal muəllim.

YOLƏ  ŞAİR – Camal Lələzoə bənə qıləy yolə şairi tolışə xəlği ədəbiyyatədə ıştə movqeyış heste. Çoknə bini nəsrədə ıştə məxsusi riyəş hestebu, nəzmədən ıştə dastı-xəttış heste. Az hejo əçəy şeironku boştəro çiçsə omutedəm. Çəy şeiri təsvir ve zumande. Şeiron məno tərəfo nığıl, həmən bə zıvoni nıştedən. Camal muəllim şeir rufinə odəme. Təsaduf nışe ki, çəy da qılə kitobiku həşt qılə nəzm janrədəye.

Əv yolə boğbone, şeir əçəy vıl,

Əhandon bə ico kardə dardı-dıl,

Sıxanon rəvone, mənoşən nığıl,

Xəlği ovəynəye şair həm alim,

Tarix nıvıştedə Camal muəllim.

     Im mevzuon hələ ve dıroz karde əbiy. Çokə inson, mehribonə xıyzon yol, azizə boə, dıləsutə dədə, sadiqə dust, səmimiyə həmro, vətənpərvərə inson,.... Əmmo çımı ğələm bənə Camal Lələzoə ğələmi tij nıbe qoroş de ım nıvıştəyon kifoyət bim.

   Camal muəllimi  de 65- yubileyi mınosibəti təbrik kardedəm. Bəy iminə nubədə xəşəconəti, dırozə mənoynə umur orzu kardedəm.  Orzu kardedəm ofəyəvonəti de ovandi dəvom bıkə. Sədoş hejo barzo bo. 

De hurməti: Aytən Eyvazon

Tolışon Sədo_ 07 (100) 31 oktyabr 2017-nə sor