LANKONİ TEƏTR

Lankoni teətr nonzəminə əsrədə ofəyə bıə. 1859 – nə  sorədə Lankoni teətrədə  çı  Aleksandr. Qribayedovi “ Qore ot uma” nomədə  məzəynə (yumor) təmşo bə səhnə noə be.Təmşoədə ə vaxti Peterburqədə təhsilsə kali  ruşinfikironən iştirak kardedəbin.

Bı həxədə Peterburqədə beşə "Severnaya pçela" nomədə

rujnomə Nəve iminə nomrədə Lankoni muxbir jıqo nıvoştedəbe: Lankoni teətrə həvəskon  da qıləsən ve pyesjon bə səhnə bekarde,  nəticədə “Qore ot uma” nomədə təmşo nişojon doy bə təmşoəkon.

Çəvo qırdəbə pulon bə kosibon paybaxş kardənə be.

1884-nə sorədə Lankonədə de Teymur bəy Bayraməlibəyovi təşəbbusi muəllimon iyən şəgirdon iştiroki  Nikolay.Vasilyeviç.Qoqoli “Jenitba” məzəynə təmşo bə səhnə noə be.

 1905-nə sorədə de Əlibəyovi dəvəti omə Huseyn Ərəblinski  qrupi iminə təmşo ovandin be.  

Çı Nəcəf bəy  Vəzirovi “ Müsubəti Fəxrəddin”  nomədə ğəziyə ssenari  I şəvi dılədə umutə Huseyn Ərəblinskiy Lankoni  səhnədə  kardə hənək  de ovandi bə sə qıne.

1906-1909-nə soronədə Muslum Maqamayevi dram xor dərnəqədə urusi iyən tırki zıvonədə təmşon bə səhnə bekardə bedəbe.

XIX əsri oxoyədə ,XX əsri  binobeyədə Lankonədə   Həşim Sadıxov, Qulam Zulfiqarov, Cahangir Daşdəmirov, Ramazan Mirzəbəyli, Həşim Kələntərli  iyən co nomədə yolə aktyoron hestbin.

1920-nə sorədə  Məryəm Bayraməlibəyova rəhbərəti jiyədə dramə dərnəki bə fəoliyət binoş karde. Əncəxən ıyo rolon jenon hənək kardedəbin. Detobə bə vaxti rolon həmə merdon hənək kardedəbin.

1930-nə soriku Lankoni Musiqinə Devlət Dram Teatri H.Ərəblinski nomi jiyədə ıştə fəoliyəti dəvom kardedəbe.  Bı teətri  çı Respublikə əməkdor artist Suleyman Səlimbəyov rəhbərəti kardəbe.

1935-nə sori fevralə manqi çordədə de Cəfər Cabbarli Almaz pyesi ıştə pardon okardə teətri direktor iyən rejissor Əli Mənsur Quliyevbe.

1949-nə soriku bı teətr devlət statusi dəqiş kardə, visti penc sor bənə H.Ərəblinski nomədə Lankoni Xəlğ Teətri  fəoliyyət nışo doəşe.

1973-nə sori dekabrə manqi 6-ku ıştə fəoliyəti dəvom kardə ım teətr həni bənə Nəcəf .Bəy .Vəzirovi nomədə Lankon Devlət Dram Teətrı fəoliyət nişo doydəbe. Bı səfə Mirzə İbrahimovi nıvoştə “Yaxşı adam” nomədə məzəynə təmşo bə səhnə noə bıəbe. Im əsəri bə təmşo rejissor Əşrəf Quliyevi hozı kardəşbe.

N.B.Vəzirovi nomədə Lankoni Devlət Dram Teətri rəhbər Məbud İsmayılzodəbe.

Lankoni Dram teətrədə vırəy iyən xarici dramaturqon əsəron bə səhnə noə bedəbe.

Ozorboyconi ğorbinə teətrə ifokoron:  Xəlği  artist - Həqiqət Rzayeva, Əməkdor artiston - Hacı Məhəmməd Qafqazlı, Cahan Talışınski, Munəvvər Kələntərli, Həşim Kələntərli, Kamil Nəcəfov, Qəni Vəliyev, Cəlil Məmmədov, Boyukxanım Əliyeva, Habil Quliyev iyən Nəzir Əliyev – Lankoni teətri perosnəyonin.

Imrujən Lankoni teətr ıştə fəoliyəti dəvom kardedə.Əmma ve təəssuf ki, maddi çətinəti hıcubəto bənə navkonəni  ıyo təmşon bə səhnə noə bedənin. Bı hisobən təmşoəkon şe-şe kam bedən.

 Hirkon Tv_Tarixədə Rizon_Aytən Eyvazon